ಕುಡಿಯುವುದನ್ನು ಬಿಡುವುದು ಸುಲಭವೇ....?

ಕೆಲವು ದಿನಗಳ ಹಿಂದೆ ಯಕ್ಷಗಾನ ಕಾರ್ಯಕ್ರಮವೊಂದಕ್ಕೆ ಹೋಗಿದ್ದೆ.ಇಪ್ಪತ್ತೈದು ವರುಷ ಯಕ್ಷಗಾನದಧ್ಯಾಯ ಪೂರೈಸಿದ ಪ್ರತಿಭಾವಂತ ನಟನಿಗೆ ಬೆಳ್ಳಿಹಬ್ಬದ ಸಂಮಾನವಿತ್ತು.

ಸನ್ಮಾನಿತ ನಟ ಒಬ್ಬ ಪ್ರತಿಭಾವಂತ ಕಲಾವಿದ.ಆದರೆ ಅತೀವ ಮದ್ಯವ್ಯಸನಿ.ಈ ವಿಚಾರ ಕುಟುಂಬದವರಿಗೆ, ಅಭಿಮಾನಿಗಳಿಗೆ ತುಂಬಾ ಬೇಜಾರಿನ ಸಂಗತಿ.ಸನ್ಮಾನಿಸುವ ಹೊತ್ತಿನಲ್ಲಿ ಮುಖ್ಯವಾದ ವ್ಯಕ್ತಿಯೊಬ್ಬರಿಂದ ಈ ನಟನಿಗೆ ಮದ್ಯಪಾನ ಬಿಡಬೇಕೆನ್ನುವ ಒತ್ತಾಯ ಹೇರಲಾಯಿತು.ಕುಟುಂಬದವರ ಮತ್ತು ಸಭಾಸದರ ಸಮ್ಮುಖದಲ್ಲಿ.....!

ಈಗಾಗಲೇ ಸಾಕಷ್ಟು ಜನರಿಂದ, ಸಾಕಷ್ಟು ಪ್ರಸಂಗಗಳಲ್ಲಿ ಹೇಳಿಸಿಕೊಂಡಿದ್ದರೂ ಅದ್ಯಾವುದನ್ನೂ ಗಣನೆಗೆ ತೆಗೆದುಕೊಳ್ಳದೆ ನಟ ತನ್ನ ಅಭ್ಯಾಸಕ್ಕೆ ದಾಸನಾಗಿದ್ದೂ ನಿಜ... ಉಳಿದವರು ಈ ವರ್ತನೆಯಿಂದ ಬೇಸರಗೊಂಡಿದ್ದೂ ನಿಜ...

ಹಾಗಾದರೆ ಹೇಳಿ ಕೇಳಿ ಮಾಡುವುದರಿಂದ, ಪಂಚಾಯ್ತಿ ಮಾಡಿಸುವುದರಿಂದ, ಸಭೆಯಲ್ಲಿ ಎಲ್ಲರ ಸಮ್ಮುಖದಲ್ಲಿ ಹೇಳುವುದರಿಂದ ಒಬ್ಬ ವ್ಯಕ್ತಿಯ ಕುಡಿತ ಬಿಡಿಸುವುದು ಸಾಧ್ಯವೇ....?ಎಲ್ಲರೆದುರಿಗೆ ಹೇಳಿಬಿಟ್ಟರು ಎನ್ನುವ ಅವಮಾನಕ್ಕೀಡಾಗಿ ಮತ್ತೆ ಒಳ ಹೋಗಿ ಇನ್ನಷ್ಟು ಕುಡಿದಿರಲಿಕ್ಕೂ ಸಾಕು.....!

ಅದಷ್ಟು ಸುಲಭವಲ್ಲ..... ಒಮ್ಮೆ ಹಿಡಿಸಿಕೊಂಡ ಕುಡಿತವನ್ನು ಬಿಡುವುದು...!!


ಕುಡಿತ ಹಿಡಿಸಿಕೊಳ್ಳಲು ಸಾಕಷ್ಟು ಕಾರಣಗಳಿವೆ.ನಮಗೆಲ್ಲಾ ಗೊತ್ತಿದ್ದುದೆ... ಕುತೂಹಲ, ಅನುಕರಣೆ , ಅಪ್ರಬುದ್ಧತೆ ಜೊತೆಗೆ.. ಮಜಾ ಮಾಡುವ ಸ್ವಭಾವ...ಹೀಗೆ
ಕುಡಿಯುವುದಕ್ಕೂ, ಅದನ್ನು ಬಿಡದಿರಲಿಕ್ಕೂ ಇನ್ನಷ್ಟು ಕಾರಣಗಳಿವೆ.ಸಂತೋಷ , ದುಃಖ , ದುಡ್ಡು ಬಂದಿದ್ದು, ಕಳೆದಿದ್ದು, ಅವಮಾನ , ಸಮ್ಮಾನ ಹೀಗೆ.
ನಮ್ಮೂರಲ್ಲಿ ನಮ್ಮ ಮನೆಗೊಬ್ಬ ಕೆಲಸದಾಳು ಬರುತ್ತಿದ್ದ. ಆತ ಕುಡಿದುಕೊಂಡು ಬರುತ್ತಿರುವ ವೇಳೆಯಲ್ಲಿ ನಮ್ಮ ತಂದೆಗೆ ಎದುರಾಗಿಬಿಟ್ಟ ಎನ್ನುವ ಕಾರಣದಿಂದ ಅವಮಾನವಾದಂತಾಗಿ ಯಾವತ್ತೂ ಹೀಗಾಗಿರಲಿಲ್ಲ ಎನ್ನುತ್ತಾ ಅದನ್ನು ಮರೆಯಲು ಮತ್ತೆರಡು 'ಕೊಟ್ಟೆ ' ಗಂಟಲಿಗಿಳಿಸುತ್ತಿದ್ದ.......!! ಕಾರಣಗಳು ಸುಲಭವಾಗಿ ಸಿಗುತ್ತವೆ...!

ಜೊತೆಗೆ ಇಲ್ಲಿ ಗಮನಿಸುವ ಅಂಶವೆಂದರೆ,ಮದ್ಯಪಾನದಲ್ಲಿ ವಂಶವಾಹೀ ಕಾರಣಗಳೂ ಸೇರುತ್ತವೆ.ಮದ್ಯಪಾನಿಗಳ ಮಕ್ಕಳು ಕುಡಿತಕ್ಕೆ ಸಿಲುಕುವ ರಿಸ್ಕ್ ಫ್ಯಾಕ್ಟರ್ ಹೆಚ್ಚಿಗೆ ಇರುತ್ತದೆ.ಅಂದರೆ ಕುಡಿಯುವವರೆಲ್ಲರ ಮಕ್ಕಳೆಲ್ಲಾ ಕುಡುಕರಾಗುತ್ತಾರೆ ಎಂದಲ್ಲ.tendency ಹೆಚ್ಚಿಗೆ ಇರುತ್ತದೆ ಅಂತ. ಪರಿಸರ, ಸಂಸ್ಕಾರ, ಮಾರ್ಗದರ್ಶನ ಇಲ್ಲಿ ಹೆಚ್ಚಿನ ಪ್ರಭಾವ ಬೀರುತ್ತವೆ.
ಮದ್ಯಪಾನಿಗಳನೇಕರ ಮಕ್ಕಳು ಸಂಸ್ಕಾರವಂತರಾಗಿ ಇರುವುದನ್ನು ನಾನು ನೋಡಿದ್ದೇನೆ.

ಮದ್ಯಪಾನ ಅಥವಾ ಆಲ್ಕೊಹಾಲಿಸಂ ... ಇದು ಒಂದು ರೋಗ. ಜಾಡ್ಯ....

ಒಮ್ಮೆ ಕುಡಿತದ ವ್ಯಸನಕ್ಕೆ ಒಳಗಾದನೆಂದರೆ, ಆತನಿಗೆ ಮತ್ತೆ ಮತ್ತೆ ಕುಡಿಯಬೇಕೆನಿಸುತ್ತದೆ.
ಯಾರೇ ಏನೇ ಹೇಳಿದರೂ ಕುಡಿಯುವುದನ್ನು ನಿಲ್ಲಿಸಲು ಅಸಾಧ್ಯವಾಗುತ್ತದೆ.
ಕುಡಿಯುವುದನ್ನು ನಿಲ್ಲಿಸಿದರೂ ದೈಹಿಕ ತೊಂದರೆಗಳು ಕಾಣಿಸಿಕೊಳ್ಳುತ್ತವೆ. ನಡುಕ, ಬೆವರುವುದು,ಉದ್ರೇಕ, ವಾಂತಿ ಬಂದಂತಾಗುವುದು..ಇತ್ಯಾದಿ..
ಕುಡಿತ ಅಭ್ಯಾಸವಾದಂತೆ ತೆಗೆದುಕೊಳ್ಳುವ ಆಲ್ಕೊಹಾಲಿನ ಪ್ರಮಾಣ ಕೂಡಾ ಹೆಚ್ಚು ಹೆಚ್ಚು ಬೇಕಾಗುತ್ತದೆ.ಇಲ್ಲದಿದ್ದರೆ ಕಿಕ್ ಸಾಕಾಗುವುದಿಲ್ಲ.

ಮನೆಯಲ್ಲಿ, ಹೊರಗಡೆ ಅನೇಕ ಆರ್ಥಿಕ, ಸಾಮಾಜಿಕ ತೊಂದರೆಗಳಿದ್ದರೂ ಕುಡಿಯುವುದನ್ನು ನಿಲ್ಲಿಸಲು ಸಾಧ್ಯವಾಗದಿರಲು ಕಾರಣವೇನೆಂದರೆ ಇದು ಒಂದು ರೋಗವಾಗಿ ಪರಿಣಮಿಸುವುದು. ಡಯಾಬಿಟಿಸ್, ಅಸ್ಥಮಾ ರೋಗಗಳಂತೆಯೇ ಮದ್ಯವ್ಯಸನ ಕೂಡಾ ಒಂದು ರೋಗ.. ವ್ಯತ್ಯಾಸವೆಂದರೆ ಇದು ಸ್ವಯಂಕೃತ ......!!!

ಆಲ್ಕೊಹೊಲಿಸಂ ಅಥವಾ ಮದ್ಯವ್ಯಸನವನ್ನು ಸಂಪೂರ್ಣ ಗುಣಪಡಿಸಲು ಸಾಧ್ಯವಿಲ್ಲ..
ಆದರೆ ಉಪಶಮನಕ್ಕೆ ಚಿಕಿತ್ಸೆ ಇದೆ.ಹೇಗೆ ಸಕ್ಕರೆ ಕಾಯಿಲೆ ಉಲ್ಬಣಿಸದಂತೆ ಕಾಲಕಾಲಕ್ಕೆ ತಕ್ಕ ಆರೈಕೆ ಮಾಡಬೇಕೋ ಹಾಗೆಯೇ ಮದ್ಯಪಾನ ನಿಲ್ಲಿಸಿದ ವ್ಯಕ್ತಿಗಳಿಗೆ ಆರೈಕೆ, ಮಾರ್ಗದರ್ಶನ, ಮುತುವರ್ಜಿ ಬೇಕಾಗುತ್ತದೆ.

ದುರಂತವೆಂದರೆ ಮದ್ಯವ್ಯಸನಿಗಳನ್ನು ಕುಟುಂಬದವರಾಗಲೀ, ಸಮಾಜವಾಗಲೀ ಗೌರವದಿಂದ ಕಾಣುವುದಿಲ್ಲ.ಅದು ಕುಡಿಯುವುದನ್ನು ಬಿಟ್ಟ ನಂತರವೂ ಮುಂದುವರೆಯುತ್ತದೆ.ನಿರ್ಲಕ್ಷಕ್ಕೊಳಗಾಗುವುದರಿಂದಲೂ , ಅವಮಾನಕ್ಕೊಳಗಾಗುವುದರಿಂದಲೂ ಮನಸ್ಸು ಮತ್ತೆ ಮದಿರೆಯನ್ನೆ ಬಯಸುತ್ತದೆ.ಕ್ಷಣಕಾಲ ಚಿಂತೆ ಮರೆಯಲು.....!!!

ಮದ್ಯವ್ಯಸನ ಬಿಡಿಸಲು ಚಿಕಿತ್ಸಕ ಕೇಂದ್ರಗಳಿವೆ.. ಕುಡಿಯುವುದನ್ನು ಬಿಡುತ್ತೇನೆ ಎಂದು ಎಷ್ಟು ಗಟ್ಟಿ, ದೃಢ ನಿರ್ಧಾರ ಮಾಡಿಕೊಂಡರೂ ಅಸಹಾಯಕ ಕ್ಷಣ ಹೊಂಚುಹಾಕುತ್ತಲೇ ಇರುತ್ತದೆ... ಹಾಗಾಗಿ ಇಂತಹವರಿಗೆ ನುರಿತ ತಜ್ಞರ, ವೈದ್ಯರ ಅವಶ್ಯಕತೆಯಿದೆ. ಆಪ್ತ ಸಮಾಲೋಚನೆ ಬೇಕಾಗುತ್ತದೆ.

ಮತ್ತೆ ಯಾವಾಗ ಬೇಕಾದರೂ ಆತ ಮದ್ಯಪಾನದ ಸೆಳೆತಕ್ಕೊಳಗಾಗಬಹುದು. ಅದಾಗದಂತೆ ಒಮ್ಮೆ ಚಿಕಿತ್ಸೆ ನಡೆದ ನಂತರ ವ್ಯಕ್ತಿಯನ್ನು ಗೌರವಯುತವಾಗಿ ನೋಡಿಕೊಳ್ಳುವುದು ಮುಖ್ಯ. ಕುಡುಕ ಎಂಬ ಹಣೆಪಟ್ಟಿ ಕಟ್ಟದೆ ನೈತಿಕ ಬೆಂಬಲ, ಆತ್ಮವಿಶ್ವಾಸ ಮೂಡಿಸುವುದು ಪ್ರೀತಿವಿಶ್ವಾಸ ತೋರಿಸುವುದು ಅಗತ್ಯ.